مہر کی ادائیگی سے پہلے بیوی کا انتقال ہوجائے تو؟

سوال :

مفتی صاحب ایک صاحب پوچھ رہے ہیں کہ بیوی کا انتقال ہوا ہے مہر ادا نہیں کیا اب مہر کی ادائیگی کی کیا شکل ہوگی؟ کس طرح مہر کریں؟ رہنمائی فرمائیں۔
(المستفتی : مولوی سہیل، پونے)
----------------------------------------
بسم اللہ الرحمن الرحیم
الجواب وباللہ التوفيق : شرعاً اور عقلاً ہر طرح سے افضل اور اولی یہی ہے کہ نکاح میں مہر معجل طے کی جائے یعنی نکاح کے وقت ہی مہر ادا کردی جائے تاکہ بعد میں اس طرح کے مسائل پیدا نہ ہوں۔ لیکن اگر مہر مؤجل (ادھار) طے کی گئی اور شوہر بیوی کو زندگی میں ہی مہر ادا نہیں کرسکا کہ بیوی کا انتقال بھی ہوگیا تو اب مہر کی یہ رقم مرحومہ کا ترکہ بن جائے گا۔ لہٰذا یہ رقم مرحومہ کے وارثین یعنی اس کے انتقال کے وقت اگر اس کے والدین، بچے موجود ہوں تو ان سب میں شرعی اصولوں کے مطابق تقسیم ہوگی۔ شوہر کو اولاد کی موجودگی میں اس رقم کا چوتھائی حصہ ملے گا اور اولاد کی غیر موجودگی میں نصف حصہ ملے گا۔

قَالَ اللہُ تعالیٰ : وَلَکُمْ نِصْفُ مَا تَرَکَ اَزْوَاجُکُمْ اِنْ لَمْ یَکُنْ لَہُنَّ وَلَدٌ، فَاِنْ کَانَ لَہُنَّ وَلَدٌ فَلَکُمُ الرُّبُعُ مِمَّا تَرَکْنَ مِنْ بَعْدِ وَصِیَّۃٍ یُوْصِیْنَ بِہَا۔ (سورۃ النساء، جزء آیت : ۱۲)

لأن المعجل خیر من المؤجل۔ (ہدایۃ، کتاب الصلح، باب الصلح في الدین، ۳/۲۵۱)فقط
واللہ تعالٰی اعلم
محمد عامر عثمانی ملی
16 رجب المرجب 1444