پنشن لینے کا شرعی حکم

سوال :

محترم مفتی صاحب! پینشن سے متعلق آپ کی کیا رائے ہے؟ جو بندہ اپنی سروس (جاب) سے ریٹائر ہو گیا ہے اور اس جگہ، وہ کام نہیں کررہا ہوتا ہے، اسکا پیسہ لیتا ہے۔ بہت سارے تو والینٹری ریٹائرمنٹ صرف اس لئے لے لیتے ہیں کہ آدھی پگار چالو رہے اور اپنے دوسرا دھندہ کاروبار کرتے رہیں۔ اس ضمن میں دین و حدیث کی روشنی میں کیا احکامات ہیں؟ واضح فرما دیں۔
(المستفتی : عمران الحسن، مالیگاؤں)
----------------------------------------
بسم اللہ الرحمن الرحیم
الجواب وباللہ التوفيق : سرکاری ملازمین کی سبکدوشی کے بعد انہیں ملنے والی پنشن حکومت کی طرف عطیہ اور انعام ہوتی ہے۔ اب ملازمین خواہ اپنی ملازمت کی مدت پوری کریں یا درمیان میں ہی رضاکارانہ طور پر سبکدوش ہوجائیں دونوں صورتوں میں ان کا پنشن لینا جائز ہے، اس لیے کہ ہر دو صورت میں انہیں حکومت کے ضابطہ کے مطابق پنشن ملتی ہے۔

دارالعلوم دیوبند کا فتوی ہے :
پنشن حکومت کی طرف سے ریٹائرڈ لوگوں کے لیے ایک عطیہ ہے، اس کا لینا شرعاً جائز ہے۔ (رقم الفتوی : 30038)

لہٰذا یہ کہنا غلط ہے کہ وہ کام نہیں کررہا ہے اور اس کا پیسہ لے رہا ہے۔ یہ رقم چونکہ عطیہ اور انعام ہے، لہٰذا یہاں کام کو ضروری سمجھنا درست نہیں۔

قَالَ الْفَقِيهُ أَبُو اللَّيْثِ رَحِمَهُ اللَّهُ تَعَالَى اخْتَلَفَ النَّاسُ فِي أَخْذِ الْجَائِزَةِ مِنْ السُّلْطَانِ قَالَ بَعْضُهُمْ يَجُوزُ مَا لَمْ يَعْلَمْ أَنَّهُ يُعْطِيهِ مِنْ حَرَامٍ قَالَ مُحَمَّدٌ رَحِمَهُ اللَّهُ تَعَالَى وَبِهِ نَأْخُذُ مَا لَمْ نَعْرِفْ شَيْئًا حَرَامًا بِعَيْنِهِ، وَهُوَ قَوْلُ أَبِي حَنِيفَةَ رَحِمَهُ اللَّهُ تَعَالَى وَأَصْحَابِهِ، كَذَا فِي الظَّهِيرِيَّةِ۔ (الفتاویٰ الہندیۃ : ٥/٣٤٢)فقط
واللہ تعالٰی اعلم
محمد عامر عثمانی ملی
15 صفر المظفر 1444