نس بندی کروانے کا شرعی حکم

سوال :

مفتی صاحب اگر 3 بچے  آپریشن سے ہوں اور ڈاکٹر کہے کے اب چوتھے بچے کے لیے آپریشن نہیں کر سکتے ہیں تو کیا بچے روکنے کا آپریشن کر سکتے ہیں؟ کیونکہ تین مرتبہ سیزر ہوتا ہے تب بہت زیادہ پیچیدگیاں ہوجاتی ہیں اس لئے ڈاکٹرز بولتے ہیں کہ اب پریگننسی ہوگی تو جان کو خطرہ ہوگا اور اس لئے تیسرے یا دوسرے سیزر کے بعد یا اسی میں وہ ٹیوب کاٹ کر نکال لیتے ہیں جس سے دوبارہ حمل نہیں ٹھہرتا۔
(المستفتی : شیخ امجد، مالیگاؤں)
------------------------------------------
بسم اللہ الرحمن الرحیم
الجواب وباللہ التوفيق : ایسا کوئی طریقہ اختیار کرنا جس میں مرد یا عورت میں مستقل بنیادوں پر افزائش نسل کی صلاحیت ختم ہوجائے ناجائز اور حرام ہے، اس لیے کہ یہ عمل تغییر لخلق اللہ یعنی اللہ تعالیٰ کی بناوٹ میں تبدیلی کرنے کی حرمت میں داخل ہے۔ لہٰذا صورت مسئولہ میں نس بندی (ٹیوبل لگیشن TUBAL LIGATION) کرانے کی بھی اجازت نہیں ہے، کیونکہ اس میں بھی آپریشن کے ذریعہ وہ نسیں بند کردی جاتیں ہیں جس کی وجہ سے حمل ٹھہرنا مکمل طور پر بند ہوجاتا ہے۔ ایسے حالات میں عارضی طور پر مانع حمل تدابیر اختیار کرنے کا حکم ہے، مثلاً شوہر عزل کرلے یعنی انزال کے وقت عضو باہر نکال کر منی خارج کردے یا کنڈوم کا استعمال کرے۔ یا عورت کوپرٹی اور دواؤں وغیرہ کا استعمال کرے۔

حَدَّثَنَا أَحْمَدُ بْنُ يُونُسَ ، حَدَّثَنَا إِبْرَاهِيمُ بْنُ سَعْدٍ ، أَخْبَرَنَا ابْنُ شِهَابٍ ، سَمِعَ سَعِيدَ بْنَ الْمُسَيَّبِ يَقُولُ : سَمِعْتُ سَعْدَ بْنَ أَبِي وَقَّاصٍ يَقُولُ : رَدَّ رَسُولُ اللَّهِ صَلَّى اللَّهُ عَلَيْهِ وَسَلَّمَ عَلَى عُثْمَانَ بْنِ مَظْعُونٍ التَّبَتُّلَ، وَلَوْ أَذِنَ لَهُ لَاخْتَصَيْنَا۔ (صحیح البخاری، رقم : ٥٠٧٣)

فإن الاختصاہ في الاٰدمي حرام۔ (عمدۃ القاري : ۲۰/۷۲)

خِصَاءُبَنِي آدَمَ حَرَامٌ بِالِاتِّفَاقِ۔ (الفتاوی الہندیۃ : ۵/۳۵۷)

عَنْ الْخَانِيَّةِ وَالْكَمَالِ أَنَّهُ يَجُوزُ لَهَا سَدُّ فَمِ رَحِمِهَا كَمَا تَفْعَلُهُ النِّسَاءُ۔ (شامي : ۳/۱۷۶)فقط
واللہ تعالٰی اعلم
محمد عامر عثمانی ملی
12 محرم الحرام 1443