ذو الحجہ کی 7، 8، 9، 10 تاریخ کو اولاد کے حق میں دعا؟

سوال :

محترم مفتی صاحب ! درج ذیل پوسٹ سوشل میڈیا پر گردش کررہی ہے۔ برائے مہربانی اس کی حقیقت بیان فرمائیں۔
ذی الحج کی 7 ، 8 ، 9 اور 10 تاریخ کو خاص اولاد کے حق میں دعا مانگنی ہے۔ کیونکہ ان دنوں میں حضرت ابراہیم علیہ السلام نے اپنی اولاد کے لیے دعا مانگی تھی اور اللہ تبارک وتعالیٰ نے قبول فرمائی تھی۔ اولاد کی زندگی ، صحت ، مال اور عزت میں برکت کے لیے دعا کرنی ہے۔ اولاد کے اچھے نصیب اور نیک جوڑے کے لیے دعا کرنی ہے۔ تمام ماں باپ یہ ضرور کریں۔
حج کے دن عصر 4:30 سے 5:30 کے درمیان کا وقت قبولیت کا وقت ہے۔ 447 بار اللّٰھم لبیک ۔ 21 بار اول و آخر درودِ ابراہیمی۔ پھر کوئی بھی جائز دعا کریں ان شاء اللہ عزوجل ضرور پوری ہوگی۔
(المستفتی : مولوی راشد، مالیگاؤں)
-----------------------------------------
بسم اللہ الرحمن الرحیم
الجواب وباللہ التوفيق : قرآن و حدیث سے معلوم ہوتا ہے کہ ذو الحجہ کا پہلا عشرہ بڑی فضیلت رکھتا ہے، اس میں نیک اعمال کا اجر وثواب دیگر ایام کی بہ نسبت بڑھ جاتا ہے۔ اور اللہ تعالیٰ کو اس عشرہ میں کئے گئے نیک اعمال بہت پسند ہیں۔ لہٰذا اس میں نماز، روزے، صدقات اور دعاؤں کا اہتمام جس قدر ہوسکے کرنا چاہیے۔ نیز اولاد کے حق میں والدین کی دعا تیزی کے ساتھ قبول ہوتی ہے۔ لیکن کسی حدیث میں ان ایام میں اولاد کے حق میں دعا کرنے کا حکم یا ترغیب وارد نہیں ہوئی ہے۔ اور حضرت ابراہیم علیہ السلام کا اولاد کے لیے مطلقاً دعا کرنا قرآن کریم میں ذکر کیا گیا ہے لیکن اس میں کسی مخصوص تاریخ، دن یا اوقات کا تذکرہ نہیں ہے، لہٰذا اولاد کے حق میں دعا کو کسی مخصوص دن، تاریخ یا وقت کے ساتھ متعین کرنا درست نہیں ہے۔ یہ تحریر سوشل میڈیائی پیداوار ہے، اس سے زیادہ اس کی کوئی حیثیت نہیں ہے۔ لہٰذا اس کا پھیلانا جائز نہیں ہے۔

ثَلاثُ دَعَوَاتٍ يُسْتَجَابُ لَهُنَّ لا شَكَّ فِيهِنَّ : دَعْوَةُ الْمَظْلُومِ ، وَدَعْوَةُ الْمُسَافِرِ ، وَدَعْوَةُ الْوَالِدِ لِوَلَدِهِ ۔(ابن ماجه، رقم :3862)

فهذا سيدنا إبراهيم يرفع أكف الضراعة طالبا من الله تعالى أن يرزقه أبناء صالحين مصلحين فقال : رَبِّ هَبْ لِي مِنَ الصَّالِحِينَ۔ (الصافات : 100)فقط
واللہ تعالٰی اعلم
محمد عامر عثمانی ملی
27 ذی القعدہ 1442