ناپاکی کی حالت میں سحری کرنے کا حکم

سوال :

مفتی صاحب ایک سوال ہے کہ سحری سے پہلے اگر ہمبستری ہو جائے اور نہانے کو وقت نہ ملے تو کیا ہم سحری کر سکتے ہیں؟ ایسی حالت میں کیا روزہ ہوگا یا نہیں؟ جواب عنایت فرمائیں۔
(المستفتی : انصاری محمد عبداللہ، مالیگاؤں)
------------------------------------------
بسم اللہ الرحمن الرحیم
الجواب وباللہ التوفيق : اگر کسی شخص کو سحری کے وقت غسل کرنے کی حاجت ہو تو بہتر تو یہی ہے کہ غسل کرکے سحری کرلے، لیکن اگر غسل کرنے کا وقت نہ ہو تو ہاتھ منہ دھو کر سحری کرلے، اور غسل بعد میں کرلے اگرچہ یہ غسل صبح صادق کے بعد ہی کیوں نہ ہو۔ تب بھی اس کا روزہ درست ہوجائے گا۔ البتہ اس کا خیال رہے کہ غسل میں سُستی کرکے فجر کی جماعت ترک کردینا یا قضا کردینا سخت گناہ کی بات ہے، جس سے بچنا ضروری ہے۔

(أَوْ أَصْبَحَ جُنُبًا وَ) إنْ بَقِيَ كُلَّ الْيَوْمِ۔ (شامی : ٢/٤٠٠)فقط
واللہ تعالٰی اعلم
محمد عامر عثمانی ملی
02 رمضان المبارک 1442