حمل کے دوران صحبت کرنے کا حکم

سوال :

حالت حمل میں جماع کا‌ حکم کیا ہے؟ جبکہ عورت ۵/٦ مہینہ کی حاملہ ہو، ہمارے معاشرے میں ‌افواہ ہے کہ اگر جماع کیا تو ہونے والی اولاد کے منہ پر‌ جاتا ہے۔ آپ شریعت کی روشنی میں رہنمائی فرمائیں۔
(المستفتی : ابرار الحق قریشی، احمد نگر)
----------------------------------------
بسم اللہ الرحمن الرحیم
الجواب وباللہ التوفيق : سوال نامہ میں مذکور افواہ کی کوئی حقیقت نہیں ہے۔ کیونکہ حمل کے ایام میں شروع سے لے کر اخیر تک کسی بھی وقت بیوی سے جماع کرنا جائز اور درست ہے، شرعاً اس میں کوئی قباحت نہیں ہے۔ بلکہ فقہاء نے تو اس کے فوائد بھی بیان کیے ہیں کہ حالتِ حمل میں جماع کرنے سے بچے کے بال بڑھتے ہیں اور اس کی بینائی اور سماعت بھی تیز ہوتی ہے۔ البتہ اگر کسی عذر کی وجہ سے کوئی دِین دار اور ماہر طبیب یا ڈاکٹر احتیاط کا مشورہ دے تو الگ بات ہے، ایسی صورت میں اس کے مشورہ پر عمل کیا جائے گا۔

لِئَلَّا يَسْقِيَ مَاءَهُ زَرْعَ غَيْرِهِ إذْ الشَّعْرُ يَنْبُتُ مِنْهُ
(قَوْلُهُ: إذْ الشَّعْرُ يَنْبُتُ مِنْهُ) الْمُرَادُ ازْدِيَادُ نَبَاتِ الشَّعْرِ لَا أَصْلُ نَبَاتِهِ، وَلِذَا قَالَ فِي التَّبْيِينِ وَالْكَافِي؛ لِأَنَّ بِهِ يَزْدَادُ سَمْعُهُ وَبَصَرُهُ حِدَةً كَمَا جَاءَ فِي الْخَبَرِ. اهـ.
وَهَذِهِ حِكْمَتُهُ، وَإِلَّا فَالْمُرَادُ الْمَنْعُ مِنْ الْوَطْءِ لِمَا فِي الْفَتْحِ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ «لَا يَحِلُّ لِامْرِئٍ يُؤْمِنُ بِاَللَّهِ وَالْيَوْمِ الْآخِرِ أَنْ يَسْقِيَ مَاءَهُ زَرْعَ غَيْرِهِ» يَعْنِي إتْيَانَ الْحُبْلَى رَوَاهُ أَبُو دَاوُد وَالتِّرْمِذِيُّ وَقَالَ حَدِيثٌ حَسَنٌ. اهـ. شُرُنْبُلَالِيَّةٌ۔ (الدر المختار مع رد المحتار : ٣/٤٩)فقط
واللہ تعالٰی اعلم
محمد عامر عثمانی ملی
07 ربیع الاول 1442