برہنہ وضو اور غسل کرنے کا حکم

سوال :

محترم مفتی صاحب! کیا غسل خانہ میں مکمل طور پر برہنہ غسل کرسکتے ہیں؟ یا ستر ڈھک کر غسل کرنا ضروری ہے؟ برہنہ حالت میں وضو کرلیا گیا تو اس کا کیا حکم ہوگا؟ مدلل جواب ارسال فرمائیں عین نوازش ہوگی۔

(المستفتی : محمد فاروق، مالیگاؤں) 

--------------------------------

بسم اللہ الرحمن الرحیم 

الجواب وباللہ التوفيق : ایسی جگہیں جہاں کسی کی نظر پڑنے کا اندیشہ نہ ہو وہاں برہنہ غسل کرنے میں شرعاً کوئی حرج نہیں۔ آج کل غسل خانے ایسے ہی ہوتے ہیں جن میں بے پردگی کا بالکل بھی اندیشہ نہیں ہوتا۔ لہٰذا ان میں مکمل برہنہ غسل کرنا بلاکراہت جائز اور درست ہے، ستر کا ڈھکنا ضروری نہیں۔ کیونکہ حضرت موسیٰ علیہ السلام اور حضرت ایوب علیہ السلام کے برہنہ نہانے کی شہادت صحیح احادیث سے ثابت ہے۔ (مستفاد: احسن الفتاوی ۲/ ۳۱، فتاوی محمودیہ ڈابھیل ۵/ ۹۲، محمودیہ میرٹھ ۸/ ۱۷۵، فتاوی عثمانی ۱/ ۳۴۶، آپ کے مسائل اور ان کاحل ۳/ ۱۱٩) 

غسل سے پہلے وضو کرلینا مسنون ہے، چنانچہ جب پہلے وضو کیا جائے گا تو ظاہر ہے آدمی برہنہ ہی رہے گا۔جس سے معلوم ہوا کہ برہنہ ہونے سے وضو اور غسل پر کوئی فرق نہیں پڑتا۔ یہ عوامی غلط فہمی ہے جس کی کوئی حقیقت نہیں ہے۔

عن أبي ہریرۃ رضي اللہ عنہ عن النبي صلی اللہ علیہ وسلم قال : بینا أیوب یغتسل عریانا، فخر علیہ جراد من ذہب، فجعل أیوب یحتثی في ثوبہ، فناداہ ربہ یا أیوب أ لم أکن أغنیتک عما تری؟ قال : بلی وعزتک ولکن لاغنی بي عن برکتک۔ (بخاري، باب من اغتسل عریانا، النسخۃ الہندیۃ ۱/ ۴۲، رقم: ۲۷۹)

عن أبي ہریرۃ رضي اللہ عنہ عن النبي صلی اللہ علیہ وسلم قال: کانت بنو إسرائیل یغتسلون عراۃ، ینظر بعضہم إلی بعض، وکان موسیٰ علیہ السلام یغتسل وحدہ، فقالوا: و اللہ ما یمنع موسیٰ أن یغتسل معنا إلا أنہ آدر، فذہب مرۃ یغتسل فوضع ثوبہ علی حجر، ففر الحجر بثوبہ، فخرج موسیٰ في أثرہ یقول: ثوبي یا حجر ثوبي یا حجر، حتی نظرت بنو إسرائیل إلی موسیٰ، فقالوا: و اللہ ما بموسیٰ من بأس، وأخذ ثوبہ، فطفق بالحجر ضربا۔ (بخاري شریف، باب من اغتسل عریانا، النسخۃ الہندیۃ ۱/ ۴۲، رقم: ۲۷۸)

وقال بہز بن حکیم عن أبیہ عن جدہ عن النبي ﷺ: اللہ أحق أن یستحیي منہ من الناس۔ إن ظاہر حدیث بہز یدل علی أن التعری في الخلوۃ غیر جائز مطلقا، لکن استدل المصنف علی جوازہ في الغسل بقصۃ موسی وأیوب علیہما السلام۔ (فتح الباري، کتاب الغسل، باب من اغتسل عریانا الخ، مکتبہ أشرفیہ ۱/ ۵۰۷، ۵۰۸، رقم: ۲۷۸، دارالفکر بیروت ۱/ ۳۸۶، بحوالہ فتاوی قاسمیہ)فقط

واللہ تعالٰی اعلم

محمد عامر عثمانی ملی

20 شوال المکرم 1441