شادی کارڈ پر لڑکی کا نام لکھنا

*شادی کارڈ پر لڑکی کا نام لکھنا*

سوال :

معزز و محترم مفتی صاحب! شادی بیاہ کے موقع پر جو کارڈ چھاپے جاتے ہیں رشتہ دار اور دوست احباب میں تقسیم کرنے کے لئے، تو اِن کارڈ میں لڑکی کا بھی نام لِکھا جاتا ہے جس کی شادی ہے۔ لیکن کچھ حضرات اس سے پرہیز کرتے ہیں، وہ اس لئے کہ لڑکی کے نام کا بھی پردہ ہوتا ہے۔ اور جو لوگ لڑکی کا نام لکھ دیتے ہیں اُنہیں کوئی گُناہ تو نہیں ہوگا؟
(المستفتی : شہروز انجینئر، مالیگاؤں)
------------------------------------------
بسم اللہ الرحمن الرحیم
الجواب وباللہ التوفيق : حدیث شریف میں آتا ہے کہ نکاح کا اعلان کرو جس کے پیشِ نظر فضول خرچی اور نام ونمود سے احتراز کرتے ہوئے نکاح اور ولیمہ کے لیے دعوت نامہ (شادی کارڈ) بنوانا شرعاً جائز اور درست ہے، کیونکہ یہ بھی اطلاع اور اعلان کی ایک شکل ہے۔ اب اس اعلان کی پورے طور پر تکمیل اس وقت ہوگی جب شادی کارڈ میں لڑکے اور لڑکی دونوں کا نام موجود ہو۔ کیونکہ نکاح کے اعلان کا ایک مقصد یہ بھی ہے کہ لوگوں کو اس بات کا علم ہوجائے کہ فلاں شخص کی فلاں بیٹی کا نکاح ہوچکا ہے، تاکہ نکاح کا پیغام بھیجنے والوں کو کسی قسم کا مغالطہ نہ ہو۔ لہٰذا شادی کارڈ پر لڑکی کا نام بھی لکھنا چاہیے۔

اسی طرح یہ بھی معلوم ہونا چاہیے کہ شریعتِ مطہرہ میں لڑکی کے نام کا کوئی پردہ نہیں ہے۔ اگر عورتوں کے نام کا پردہ ہوتا تو ازواجِ مطہرات اور بنات نبی ﷺ اسکی زیادہ مستحق ہوتیں کہ ان کے نام کو چھپایا جاتا۔ جبکہ آج ان مقدس اور پاکیزہ ہستیوں کے نام امت میں مشہور و معروف ہیں۔ نیز خود قرآنِ کریم میں حضرت مریم کا نام موجود ہے۔

لہٰذا درج بالا تفصیلات کو مد نظر رکھتے ہوئے یہی کہا جائے گا کہ شادی کارڈ میں لڑکی کا نام نہ لکھنا ایک قسم کا تکلف ہے، اور کچھ نہیں۔

قال رسول اللّٰہ صلی اللّٰہ علیہ وسلم: أعلنوا ہٰذا النکاح واجعلوہ في المساجد۔ (سنن الترمذي ۱؍۲۰۷)

قال اللہ تعالیٰ : اِنَّ الْمُبَذِّرِیْنَ کَانُوْآ اِخْوَانَ الشَّیٰطِیْنِ، وَکَانَ الشَّیْطٰنُ لِرَبِّہٖ کَفُوْرًا۔ (سورہ بني إسرائيل، آیت: ۲۷)

قال القرطبي : والتبذیر إنفاق المال في غیر حقہ ولا تبذیر في عمل الخیر۔ (الجامع لأحکام القرآن للقرطبي ۱۰؍۲۴۷)

عن نافع قال سمعت عبد اللّٰہ بن عمر رضي اللّٰہ عنہ یقول: قال رسول اللّٰہ صلی اللّٰہ علیہ وسلم: أجیبوا ہٰذہ الدعوۃ إذا دعیتم لہا، قال: وکان عبد اللّٰہ یأتي الدعوۃ في العرس وغیر العرس وہو صائم۔ (صحیح البخاري ۲؍۷۷۸ رقم: ۴۹۸۵)

ویندب إعلانہ أي إظہارہ۔ (شامي ۴؍۶۶ زکریا)

أن الغائبۃ لا بد من ذکر إسمہا، واسم أبیہا، وجدہا، وإن کانت معروفۃ۔ (شامي ۴؍۹۰ زکریا)فقط
واللہ تعالٰی اعلم
محمد عامر عثمانی ملی
26 ربیع الاول 1441