*احرام کی حالت میں ٹوتھ پیسٹ/پاؤڈر استعمال کرنا*
سوال :
مفتی صاحب ایسا ٹوتھ پیسٹ/پاؤڈر جس میں الائچی، لونگ یا دیگر خوشبودار کیمیکل ملائے جاتے ہیں ایسے منجن کا بحالت احرام استعمال کرنا کیسا ہے؟
(المستفتی : محمد عبداللہ، مالیگاؤں)
-----------------------------
بسم اللہ الرحمن الرحیم
الجواب وباللہ التوفيق : اگر ٹوتھ پیسٹ/پاؤڈر میں لونگ، الائچی یا دیگر خوشبو دار اشیاء شامل ہوں اور وہ پکی ہوئی نہ ہوں، نیز مقدار کے اعتبار سے خوشبو دار چیز مغلوب ہو، (یعنی کم ہو) تو بحالتِ احرام ایسے منجن کا استعمال مکروہ ہے۔ لیکن اس کی وجہ سے مُحرم پر کچھ بھی واجب نہ ہوگا۔ البتہ اگر ٹوتھ پیسٹ/پاؤڈر میں خوشبو دار چیز غالب ہو تو چونکہ منجن پورے منہ یا اکثر حصہ میں لگ جائے گا، جس کی وجہ سے دم واجب ہوگا۔
عام طور پر ٹوتھ پیسٹ/پاؤڈر میں خوشبو شامل ہوتی ہے اور وہ پکی ہوئی بھی نہیں ہوتی، لیکن خوشبو والی چیز غالب نہیں ہوتی، بلکہ مغلوب ہوتی ہے جس کی وجہ سے اس کا استعمال مکروہ ہوگا۔ لہٰذا بہتر یہی ہے کہ احرام کی حالت میں مسواک کے استعمال پر اکتفا کیا جائے، ٹوتھ پیسٹ/پاؤڈر استعمال کرنے سے اجتناب کیا جائے یا پھر ایسا منجن استعمال کیا جائے جس میں خوشبو والی اشیاء شامل نہ ہوں۔
فلو اکل طیباً کثیراً وھو ان یلتصق باکثرمنہ یجب الدم وان کان قلیلا بان لم یلتصق باکثر فمہ فعلیہ الصدقۃ ھذا اذا اکلہ‘ کما ھو من غیر خلط او طبخ فلو جعلہ فی الطعام وطبخہ فلا باس باکلہ لانہ خرج من حکم الطیب وصار طعاماً وکذلک کل ما غیر تہ النارمن الطیب فلا بأس باکلہ ولو کان ریح الطیب یو جد منہ ۔ الیٰ قولہٰ۔ وفی الفتح فان جعلہ فی طعام قد طبخ کالزعفان والا فاویہ من الزنجبیل والدارصینی یجعل فی الطعام فلا شئی علیہ فعن ابن عمر رضی اﷲعنہ انہ کان یاکل السکباج الا صفر وھو محرم وان لم یطبخ بل خلطہ بما یوکل بالا طنخل کا ملح وغرہ فان کانت رائحتہ موجودۃکرہ ولا شئی علی اذا کان مغلوبا فانہ کالمستھلک امااذاکان غالباً فھو کالزعفران الخالص فیجب الجزاء وان لم تظھرر الحتہ الخ۔ (غنیۃ الناسک، ۱۳۲/باب الجنایات، مطلب فی أکل الطیب وشربہ/بحوالہ فتاوی رحیمیہ)فقط
واللہ تعالٰی اعلم
محمد عامر عثمانی ملی
24 ذی القعدہ 1440
کوئی تبصرے نہیں:
ایک تبصرہ شائع کریں