کیا غیرمسلم کو زکوٰۃ دینا جائز ہے؟

سوال :

محترم مفتی صاحب! آج ایک صاحب نے میسیج دیا ہے کہ غیر مسلم کو زکوۃ دے سکتے ہیں، سورۃ توبہ میں اس بات کا ذکر ہے۔ آپ سے تحقیق مطلوب ہے۔
(المستفتی : محمد داؤد، مالیگاؤں)
------------------------------------------
بسم اللہ الرحمن الرحیم
الجواب وباللہ التوفيق : سورہ توبہ میں جن آٹھ مصارفِ زکوٰۃ کا بیان ہے ان میں سے ایک مؤلفۃ القلوب بھی ہے، نبی کریم صلی اللہ علیہ و سلم کے زمانے میں غیرمسلموں کو اسلام سے قریب کرنے کے لیے انہیں زکوٰۃ دی جاتی تھی۔

البتہ زکوٰۃ میں مؤلفۃ القلوب کا حصہ حضرت ابوبکر صدیق رضی اللہ عنہ کے زمانۂ خلافت کے شروع میں ہی صحابہ کرام رضی اللہ عنھم اجمعین کے اتفاق و اجماع سے ساقط ہوگیا۔ چنانچہ ابن ابی شیبہ نے عامر شعبی رحمہ اللہ سے روایت کی ہے کہ مؤلفۃ القلوب آپ صلی اللہ علیہ و سلم کے زمانے میں تھے (یعنی انکا حصہ قائم تھا) پھر جب ابوبکر صدیق رضی اللہ عنہ خلیفہ ہوئے تو ان کا حصہ بند ہوگیا۔

واضح رہے کہ کہ حکمِ شرعی جب کسی علت پر مبنی ہو تو اس علت کے اٹھ جانے سے حکم بھی اٹھ جاتا ہے مطلب یہ ہے کہ مؤلفۃ القلوب کو زکوٰۃ  کا مال دینے کی اجازت اسلام کے ضعف اور مسلمانوں کی کمی کی وجہ سے ہوگئی تھی اور جب اللہ تعالیٰ نے اسلام کو عزت اور قوت و غلبہ عطا فرما دیا اور مسلمانوں کی جماعت زیادہ ہوگئی تو غیرمسلموں کو زکوٰۃ دئیے جانے کی علت ختم ہونے کی وجہ سے یہ حکم بھی مرتفع ہوگیا۔

نیز حضرت معاذ رضی اللہ عنہ کی روایت میں ہے کہ زکوٰۃ مسلمانوں کے مالداروں سے لی جائے گی اور ان کے فقراء اور مساکین میں تقسیم کی جائے گی۔

امید ہے کہ درج بالا تفصیلات میں آپ اپنے سوال کا جواب پاگئے ہوں، لہٰذا یہ بھی ملحوظ رہے کہ غیرمسلم کو زکوٰۃ دینا جائز نہیں ہے، اگر کسی نے زکوٰۃ دے دی تو زکوٰۃ ادا نہیں ہوگی، دوبارہ زکوٰۃ دینا ہوگا۔

اِنَّمَا الصَّدَقٰتُ لِلْفُقَرَآئِ وَالْمَسٰکِیْنِ وَالْعٰمِلِیْنَ عَلَیْہَا وَالْمُؤَلَّفَۃِ قُلُوْبُہُمْ وَفِیْ الرِّقَابِ وَالْغَارِمِیْنَ وَفِیْ سَبِیْلِ اللّٰہِ وَابْنِ السَّبِیْلِ، فَرِیْضَۃً مِّنَ اللّٰہِ، وَاللّٰہُ عَلِیْمٌ حَکِیْمٌ۔ (سورۃ التوبۃ، آیت :۶۰)

و سہم مؤلفۃ قلوبہم سقط باجماع الصحابۃ فی صدر خلافۃ ابی بکر ؓ لان اللہ اعزالا سلام و اغنی عنہم والحکم متی ثبت معقولا لمعنی خاص یرتفع و ینتہی بذہاب ذلک المعنی انتھیٰ (تفسیر مدارک، التوبۃ : ۶۰)

اخرج ابن ابی شیبۃ عن عامر الشعبی انما کانت المؤلفۃ علی عھد رسول اللہ ﷺ فلما ولی ابوبکر انقطعت۔ (البرہان شرح مواہب الرحمن، کتاب الزکاۃ، باب المصارف، ۱/۵۲۸، ۵۲۹)

ولا یجوز صرف الزکوۃ الی الکافر بلا خلاف، لحدیث معاذؓ: خذہا من أغنیائہم وردہا الی فقرائہم۔ (الہدایۃ : ۱/۲۰۵)

واما أہل الذمۃ فلا یجوز صرف الزکوٰۃ إلیہم بالاتفاق۔ (الفتاویٰ الہندیہ : ۱/۱۸۸)فقط
واللہ تعالٰی اعلم
محمد عامر عثمانی ملی
12 رمضان المبارک 1440