روزے کی حالت میں ماہواری آجائے تو؟

*روزے کی حالت میں ماہواری آجائے تو؟*

سوال :

کیا فرماتے ہیں علماء دین ومفتیان شرع متین درمیان مسئلہ ھذا کے کہ اگر روزہ کی حالت میں عورت کو ماہواری آجائے تو کیا حکم ہے؟ مفصل مدلل رہنمائی فرمائیں۔
(المستفتی : محمد محسن، کوپرگاؤں)
------------------------------------------
بسم اللہ الرحمن الرحیم
الجواب وباللہ التوفيق : اگر کسی عورت کو افطار سے پہلے کسی بھی وقت حیض آجائے تو اس کا روزہ فاسد ہوجائے گا، اور اس کے بدلہ قضاء کرنا واجب ہوگی۔ اس صورت میں اسکا کھانا پینا درست ہے، کھانے پینے سے رکے رہنا جائز نہیں ہے، فقہاء نے اس کی وجہ یہ لکھی ہے کہ اس عورت کے لئے روزہ رکھنا حرام ہے، اور کھانے پینے سے رک جانا حرام کی مشابہت ہے، اور حرام کی مشابہت اختیار کرنا بھی حرام ہے، البتہ کھلے عام نہیں کھانا چاہئے، بلکہ چھپ کر کھانا چاہئے۔

و اما فی حالۃ تحقق الحیض والنفاس فیحرم الامساک لان الصوم منھا حرام والتشبہ بالحرام حرام ۔۔۔ و لکن لا یأکلن جھرا بل سرا۔ (طحطاوی : ص: ۳۷۱)
مستفاد : کتاب الفتاوی)فقط
واللہ تعالٰی اعلم
محمد عامر عثمانی ملی
04 رمضان المبارک 1440